Watumishi wa Mamlaka ya Majisafi na Usafi wa Mazingira Singida (SUWASA) wametoa elimu ya usomaji na utunzaji wa mita za maji.Elimu hiyo ya nyumba kwa nyumba imetolewa kwa wakazi wa eneo la Utemini na Sabasaba ambapo watumiaji wa huduma ya maji, wameelekezwa namna ya kuhakiki usomaji wa mita za maji, ili kuepuka bili zisizoendana na matumizi pamoja na ushiriki katika utunzaji wa mita za maji, kwa kutoa taarifa za mita mbovu Uvujaji na uharibifu wowote wa mita unaojitokeza.Watumiaji wa maji wamesisitizwa pia kushiriki katika kuhakikisha usalama wa mita za maji kama kuzieekea vizuizi ili kuepuka uharibifu kama kugongwa na madhara ya aina hiyo.SUWASA kwa kushirikiana na Jeshi la polisi Singida inaendelea na uchunguzi kubaini waharifu wanaojihusisha na wizi wa miundombinu ya maji.Elimu hiyo yenye lengo la kuepusha upotevu wa maji, kuondoa bili bambikizi na kuhakikisha usalama wa mita, inaendelea kutolewa katika maeneo Mengine ya Manispaa ya Singida.

Pichani, Watumishi wa Mamlaka ya Majisafi na Usafi wa Mazingira Singida (SUWASA) wakiwa katika Mafunzo ya Programu ya JTP kwa kushirikiana na Wizara ya Maji, yaliyofanyika katika Hoteli ya Regency Manispaa ya Singida.

Katibu Tawala wa Mkoa wa Singida Dkt. Fatuma Mganga ametembelea Mradi wa Ujenzi wa Mabwawa ya Kutibu Majitaka Manga, kwa ajili ya Kukagua Maendeleo ya MradiAkielezea hatua ya Mradi Kaimu Mkurugenzi Mtendaji Hosea Maghimbi amesema Mradi huo wenye thamani ya shilingi bilioni 1.73 umefikia asilimia 71 ya utekelezaji wake na Ujenzi wa Mabwawa matano ya kutibu majitaka umekamilika.Amesema Mradi unatarajiwa kukamilika tarehe 27 Oktoba 2025 na Shughuli zinazoendelea kwa sasa, ni ufungaji wa fensi kuzunguka eneo la mradi, ulazaji wa mabomba ya kupitisha maji taka kati ya mabwawa na ukamilishaji wa Maabara ya kupima majitaka.Dkt. Fatuma amepongeza hatua iliyofikiwa na kuelekeza SUWASA kuendelea kusimamia vyema Mradi huo, ili kufikia lengo la Mradi la kuhudumia wananchi kwa wakati uliopangwa.Mradi huu unatarajia kuimarisha Usafi wa Mazingira katika Manispaa ya Singida, kuondoa hatari ya magonjwa ya kuhara na matumbo, kuimarisha kilimo cha umwagiliaji kwa kutoa maji yaliyotibiwa na mbolea bora.

Wataalam kutoka Mamlaka ya Majisafi na Usafi wa Mazingira Singida (SUWASA) wakiwa Ikungi kwa ajili ya kufanya makabidhiano ya kazi ya maboresho katika Mradi wa Uboreshaji wa huduma ya maji katika Miji Midogo.Makabidhiano hayo yamehusisha Wataalam wa SUWASA Fundi Sanifu Mkami Magesa, Msimamizi wa Kanda ya Ikungi James Malima na _Local_ Fundi Simon Maghembe.Katika mji wa Ikungi Mradi huu una thamani ya shilingi milioni 30 ambapo fedha hii inatolewa na Serikali ya Jamhuri ya Muungano wa Tanzania kupitia Mfuko wa Maji wa Taifa ambayo itajumuisha kazi za ununuzi wa mabomba na viungio, uchimbaji wa mitaro, ujenzi wa chemba, ubadilishaji wa mabomba yenye kipenyo kidogo, uwekaji wa alama za njia za mabomba (markerpost) pamoja na ukarabati wa tanki moja la Muungano lenye uvujaji.Maboresho yanatarajiwa kufanyika pia katika maeneo yote ya miji midogo kama Ikungi, Puma, Iguguno, Sepuka na Irisya ambayo yanayohudumiwa na SUWASA, ili kuimarisha utoaji wa huduma.

Mamlaka ya Majisafi na Usafi wa Mazingira Singida (SUWASA) imepokea Wakaguzi kutoka Ofisi ya Rais Tume ya Utumishi wa Umma ambao wamefika katika ofisi za SUWASA kwa ajili ya ukaguzi wa kiutendaji katika maeneo mbalimbali ya kiutumishi.Wakaguzi hao ambao wameongozwa na Mkaguzi Kiongozi Bi. Sheila Dachi wameeleza kuwa, huu ni Ukaguzi wa kawaida wa Mwaka 2024/2025 ambapo lengo ni kuhakikisha sheria za kiutumishi zinazingatiwa katika utendaji.

Mamlaka ya Majisafi na Usafi wa Mazingira Singida (SUWASA) imewakamata watuhumiwa 2 wa wizi wa mita za maji, wanaotambulika kwa majina ya Faraja Abel na Ayubu Shabani.Watuhumiwa hao wamekamatwa katika eneo la Minga Mtaa wa Arusha road, wakiwa na Mita moja ya Maji iliyoharibiwa.SUWASA ilipokea taarifa ya kukamatwa kwa watu hao kutoka kwa raia wema na kwa kushirikiana na Jeshi la polisi walifika katika eneo la tukio na kuwakamata.Watuhumiwa hao wamefikishwa katika kituo kikuu cha polisi Singida Manispaa, kwa ajili ya kuendelea na uchunguzi zaidi juu ya uharibifu mkubwa wa miundombinu uliofanyika.Katika Sheria ya Usambazaji Maji na Usafi wa Mazingira ya Mwaka 2019 adhabu ya Makosa ya uharibifu wa miundombinu ya maji ni faini hadi shilingi milioni 50 au kifungo hadi miaka mitano.SUWASA inawatahadharisha wale wote wanaojihusisha uharibifu huu wa Mali za Umma kuacha mara moja kwani hatua kali zitachukuliwa dhidi yao.